Bu’n bleser eithriadol cael cwmni Aled Jones Williams yn ystod rhai o f’ymeliadau ar y daith ymestyn yn ystod taith ‘Iesu!’, ac erbyn hyn yn edrych ymlaen yn arw at weld ein drama newydd nesa’n cael ei llwyfannu, sef ‘Tyner yw’r Lleuad Heno’ gan Meic Povey. Cawsom ddarlleniad o’r ddrama yn ddiweddar a dwi’n hyderus iawn fod Meic wedi cynhyrchu perl fach arall yma.

Yn ddiweddar fe dderbyniodd Aled a Meic wahoddiad i fod yn 'Awduron Preswyl' i’r cwmni am gyfnod o dair blynedd ac rydan ni’n hynod falch o gael y cyfle i gyhoeddi hynny. Yn ystod y flwyddyn bu’r ddau yn cynnal sesiynnau trafod a gweithdai ysgrifennu trwy Gymru gyfan, a bydd cael cyswllt mwy pendant yn golygu y gallwn ddatblygu ar y gwaith sydd eisioes wedi ei wneud. Yn ogystal â chyfranogi i drafodaethau a gweithdai bydd Meic ac Aled hefyd yn barod i fentora awduron llai profiadol sy’n datblygu syniadau i’r cwmni. Credwn fod hwn yn gam cynhyrfus ymlaen i greu sylfaen gadarn i’n hegin awduron.

Cefin Roberts
Rhagfyr '08

 

Cyhoeddwyd: 11 Rhagfyr 2008