Newyddion

Bydd rhaglen artistig Theatr Genedlaethol Cymru dros yr haf a'r hydref yn cynnwys prosiect cymunedol, cyfieithiad o un o glasuron Shakespeare, taith ryngwladol a chynllun i ddatblygu dawn cyfarwyddwyr, cyhoeddodd Arwel Gruffydd, Cyfarwyddwr Artistig Theatr Genedlaethol Cymru heddiw (19 Mawrth 2012).

C'laen ta!

Mae'r cyfnod nesaf yn hanes y Cwmni drama teithiol cenedlaethol Cymraeg  yn cychwyn ym mis Mehefin 2012 gyda phrosiect cymunedol 'C'laen ta!' yng Nghaernarfon.  Mae'r prosiect, sydd mewn partneriaeth â Galeri Caernarfon ac mewn cydweithrediad â Phartneriaeth Pobol Peblig, yn cynrychioli'r trydydd cam creadigol dan law'r dramodydd ifanc Bethan Marlow ym mherthynas ddiweddar y Theatr Genedlaethol â phobl tref Caernarfon.

Meddai Arwel:  "Bydd 'C'laen 'Ta!' yn brosiect creadigol fydd yn dod ag artistiaid proffesiynol ac aelodau o'r gymuned ynghyd mewn ffordd newydd eto. Yn wahanol i'r ddau brosiect blaenorol yn y dref, 'Sgint' a 'Sgin Ti Syniad?' bydd 'C'laen 'ta!' yn ogystal â chreu a chyflwyno darn o theatr, yn darganfod a datblygu arweinwyr ar gyfer ac o fewn y gymuned. Mae'r hadau eisoes wedi eu plannu, ond rŵan, rydym am i'r hadau hynny dyfu ac am adael ar ein hôl unigolion sydd yn meddu'r sgiliau a'r hyder i annog a datblygu syniadau artistig a chymdeithasol newydd o fewn y gymuned a chynorthwyo eraill i ddatblygu eu gweledigaethau creadigol eu hunain."

Y Storm

Mewn cydweithrediad â Chanolfan Mileniwm Cymru, yr Eisteddfod Genedlaethol, Pontio a Citrus Arts, yn ystod mis Awst, Medi a Hydref, fel rhan o Ŵyl Shakespeare y Byd y Royal Shakespeare Company a Gŵyl Llundain 2012 yr Olympiad Diwylliannol -, bydd cyfieithiad newydd gan Gwyneth Lewis o 'The Tempest', Y Storm -  yn cael ei lwyfannu o dan gyfarwyddyd Elen Bowman.

Gydag aelodau'r cast yn cynnwys Llion Williams (Prospero) a Meilir Rhys Williams (Ariel) a gyda thafluniadau arbennig, syrcas a cherddoriaeth fyw, bydd Theatr Genedlaethol Cymru yn creu byd hudolus a'r ynys ryfeddol o fewn pabell deithiol bwrpasol.

Bydd 'Y Storm' yn cael ei berfformio yn ystod Eisteddfod Genedlaethol Bro Morgannwg ar faes yr Eisteddfod ei hun, cyn teithio i Gaerfyrddin rhwng 18-21 Medi ac i Fangor  02-06 Hydref 2012.

Meddai Arwel:  "Mae'n fraint ac yn gyfle unigryw i ni fel Cwmni  gael bod yn rhan o Ŵyl Shakespeare y Byd a dathliadau Olympaidd.  Bydd y cyfieithiad newydd hwn gan Gwyneth Lewis yn cynnig golwg newydd ar un o glasuron Shakespeare a bydd cynhyrchiad mentrus Elen Bowman yn sicr o fod  yn brofiad theatraidd byth cofiadwy ."

Llwyth

Yn dilyn taith genedlaethol hynod lwyddiannus a pherfformiadau yng Ngŵyl Ymylol  Caeredin  2011, bydd golygon y Theatr Genedlaethol Cymru  yn troi tua'r Dwyrain Pell,  wrth i'r Cwmni, ar y cyd â Sherman Cymru, fynd â drama  gyffrous Dafydd James, 'Llwyth'  i Ŵyl Gelf Ryngwladol  Taipei o 31 Awst - 02 Medi 2012.

"Cafwyd ymateb anhygoel  i'r llwyfaniad yng Ngŵyl Caeredin y llynedd, lle roedd y cynhyrchiad yn rhan o arddangosfa arbennig y Cyngor Prydeinig, ac mae hon rŵan yn bennod gyffrous  yn hanes Theatr Genedlaethol Cymru, wrth inni fynd â chynhyrchiad Cymraeg, sydd wedi cydio cymaint yn nychymyg y gynulleidfa yma yng Nghymru, ar antur ryngwladol," meddai Arwel Gruffydd.

Bydd un perfformiad o 'Llwyth' yng Nghaerfyrddin ym mis Awst, cyn iddi neidio ar awyren i  brif ddinas Taiwan , ac yna ddychwelyd i Gymru ar gyfer perfformiadau yn Theatr Sherman Cymru, Caerdydd rhwng 12-14 Medi 2012.

Cwrs Hyfforddi Cyfarwyddwyr

Er mwyn annog gwaed newydd i'r diwydiant theatr yng Nghymru, mae Theatr Genedlaethol Cymru wedi ymrwymo fel un o bartneriaid cwrs hyfforddi newydd i gyfarwyddwyr sydd yn cael ei arwain gan gwmni Living Pictures.

Mae'r cwrs, sydd wedi ei ariannu gan Gyngor Celfyddydau Cymru, yn gwrs blwyddyn o hyd (rhan amser) a fydd yn rhoi hyfforddiant trwyadl i dri cyw cyfarwyddwyr yn y broses o ddatblygu a chyfarwyddo dramau llwyfan newydd.

Athrawon gwadd y prosiect,  ymysg eraill fydd Marc Rees a Sash Wares  o'r Royal Court.

Bydd tri awdur profiadol yn cael ei comisiynu gan Theatr Genedlaethol Cymru i ysgrifennu tair drama a fydd yn cael ei datblygu fel rhan o'r cwrs a byddant yn cael ei perfformio ar lwyfan Sherman Cymru, Caerdydd yn ystod mis Medi 2013.

Gwahoddir ceisiadau gan gyw cyfarwyddwyr erbyn 05 Ebrill 2012.  I gael mwy o wybodaeth cysylltwch â livingpictures@btopenworld.com.

-diwedd-

Am fwy o fanylion cysylltwch â Elin Williams ar 01267 233882 neu e-bostiwch elin@theatr.com

Heddiw mae Theatr Genedlaethol Cymru yn dathlu wedi i un o gynyrchiadau'r cwmni gael ei ddewis i fod yn ran o Ŵyl Shakespeare Y Byd (World Shakespeare Festival), a gynhyrchwyd gan y Royal Shakespeare Company i Ŵyl Llundain 2012 - rhaglen gelfyddydol swyddogol y Gemau Olympaidd.

Bydd 'Y Storm', sef cyfieithiad o glasur William Shakespeare 'The Tempest', yn cael ei berfformio, mewn cydweithrediad ag Eisteddfod Genedlaethol Cymru, yn Eisteddfod Genedlaethol 2012 yn mis Awst 2012 yn Llandow, Bro Morgannwg.

Yn y cyfieithiad newydd yma gan gyn Bardd Cenedlaethol Cymru, Gwyneth Lewis, ac yn cynnwys cerddoriaeth byw, syrcas a hud a lledrith, daw Theatr Genedlaethol Cymru â'r clasur hynod yma'n fyw - gwaith meistrolgar, llawn dychymyg sy'n cael ei gweld fel drama fwyaf uchelgeisiol Shakespeare.

Bydd y tîm creadigol yn cynnwys y gyfarwyddwraig amryddawn (Deffro'r Gwanwyn, The Devil Inside Him), y cyfansoddwr Simon Allen (Royal National Theatre) a'r coreograffydd a'r cyfarwyddwr symud Liz Ranken (Royal Shakespeare Company).

Meddai Arwel Gruffydd, Cyfarwyddwr Artistig Theatr Genedlaethol Cymru:  "Mae'r Gemau Olympaidd ond yn debygol o ddigwydd mor agos i adref unwaith mewn oes, felly dwi'n hynod o falch fod digwyddiad theatraidd yn yr iaith Gymraeg yn cael ei gynnwys yn y dathliadau pwysig yma.

Aeth ymlaen:  "Mae dramâu oesol un o ddramodwyr gorau'r byd yn parhau i gael eu perfformio ymhob iaith ac mae Theatr Genedlaethol Cymru yn falch o gyflwyno cynhyrchiad yn yr iaith Gymraeg fel rhan o Ŵyl Shakespeare Y Byd.  Mae cyflwyno 'The Tempest' i gynulleidfa Gymraeg, a gweithio gyda Gwyneth i archwilio beth sydd yn digwydd i stori glasurol pan siaredir hi yn Gymraeg - o dan gyfarwyddid dyfeisgar Elen Bowman - yn mynd i fod yn ddathliad arbennig diwylliannol ac ieithyddol ond sydd yn cael ei wneud hyd yn oed yn fwy arbennig gyda'n cydweithrediad ni gydag Eisteddfod Genedlaethol Cymru.

Meddai Deborah Shaw, Cyfarwyddwr Gŵyl Shakespeare Y Byd:  "Rydym wrth ein boddau fod Theatr Genedlaethol Cymru yn creu cynhyrchiad mor uchelgeisiol i fod yn rhan o Ŵyl Shakespeare Y Byd, wedi ei wreiddio yn yr iaith Gymraeg cyfoethog a barddol yn ogystal â bod yn cyflwyno steil theatr Gymraeg cyfoes i'r cynhyrchiad.  Mae'n ychwanegiad gwych i raglen yr Ŵyl ac mae'n golygu fod Cymru yn cael ei gynrychioli gan y Theatr Genedlaethol Gymraeg a Saesneg ei hiaith - arwydd pendant o ddeffroad yn y theatr yng Nghymru dros y blynyddoedd diwethaf."

Meddai Ruth Mackenzie, Cyfarwyddwr Gŵyl Llundain 2012:  "Diolch i Theatr Genedlaethol Cymru a'n holl sêr celfyddydol, yn Haf 2012  bydd Gwyl Llundain 2012 yn dangos i'r byd ein sefydliadau blaengar celfyddydol, ac yn arddangos iddynt ein bod wedi ein hymrwymo i greu a dathlu talent o'r safon uchaf posibl."

-diwedd-

Am fwy o fanylion cysylltwch â Elin Williams ar 01267 233882 neu e-bostiwch elin@theatr.com

Mae Theatr Genedlaethol Cymru yn atgyfodi'r sioe gerdd boblogaidd 'Deffro'r Gwanwyn' i fynd ar daith genedlaethol unwaith eto y Gaeaf hwn, gyda pedwar aelod newydd yn ymuno â'r cast.

Yn seiliedig ar ddrama ddadleuol Frank Wedekind 'Spring Awakening', mae'r sioe gerdd 'Deffro'r Gwanwyn', a gyfieithiwyd i'r Gymraeg gan Dafydd James, yn stori ddadleuol fyth gofiadwy am siwrne pobl ifanc yn eu harddegau i oedolaeth ac mae'n ymdrin â gormes rhywiol wedi ei hadrodd mewn ffordd gonest a miniog.

Cafodd 'Deffro'r Gwanwyn' ei llwyfannu yn wreiddiol gan Theatr Genedlaethol Cymru yn mis Mawrth/Ebrill 2011 a bu'r sioe yn lwyddiant ysgubol gydag amryw o'r nosweithiau â phob tocyn wedi ei werthu.

Ond gyda'r ail lwyfaniad mae pedwar aelod newydd i'r cast sef Victoria Pugh a fydd yn portreadu'r amryw oedolion; Nia Ann o Gaerfyrddin a fydd yn chwarae rhan Ilse; Siôn Ifan a ddaw'n wreiddiol o Gaerfyrddin a fydd yn chwarae rhan Georg a Tomos Eames a fydd yn ymgymryd â rhan Haschen.

Mae aelodau eraill o'r cast yn cynnwys Dyfed Thomas (amryw oedolion), Aled Pedrick (Melchior), Iddon Jones (Moritz), Meilir Rhys Williams (Ernst), Berwyn Pearce (Otto), Zoe George (Martha), Ellen Ceri Lloyd (Wendla), Elain Lloyd (Anna) a Elin Llwyd (Thea).

Bydd y daith hefyd yn cynnig rhai sioeau wedi eu uwchdeitlo yn Saesneg er mwyn apelio i gynulleidfa di-gymraeg neu sydd yn dysgu Cymraeg a hefyd rhai perfformiadau yn y prynhawn.

Y gyfarwyddwraig amryddawn Elen Bowman fydd wrth y llyw yn cyfarwyddo unwaith eto a Dyfan Jones yn Gyfarwyddwr Cerdd.

Meddai Elin Williams, Rheolwr Marchnata Theatr Genedlaethol Cymru:  "Mae'n braf ein bod ni yn gallu aillwyfannu sioe a oedd mor boblogaidd a gobeithiwn yn fawr y bydd y cynulleidfaoedd yn tyrru i'w gweld unwaith eto.  Roedd ymateb y gynulleidfa, yn enwedig yr tô ifanc i'r ddrama gerdd yn rhyfeddol, ac er i'r ddrama wreiddiol gael ei ysgrifennu nôl yn 1891, mae'r modd yr addaswyd y ddrama i fod yn ddrama gerdd yn apelgar iawn i bobl ifanc ac mae'r themâu yn oesol.

Bydd Deffro'r Gwanwyn yn agor yn Y Llwyfan, Caerfyrddin ar 09 - Tachwedd 2011 cyn symud ymlaen i Ganolfan hamdden Glaslyn, Porthmadog 15-17 Tachwedd 2011; Canolfan Hamdden Y Flash, Y Trallwng 21-22 Tachwedd 2011; Canolfan Hamdden Pontardawe 25, 26 & 28 Tachwedd 2011 a Stiwdio Weston, Canolfan Mileniwm Cymru ar 1-3 Rhagfyr 2011.

Am fwy o fanylion am sioeau prynhawn a sioeau wedi eu uwchdeitlo ewch i www.theatr.com.

-diwedd-

Am fwy o wybodaeth ac am luniau o'r cast, cysylltwch â Elin Williams ar 01267 245617 neu e-bostiwch elin@theatr.com

Fe fydd drama Gymraeg gair am air newydd sydd yn defnyddio storïau pobl yn eu geiriau ei hunain yn ddechrau cyfnod newydd i ddau gwmni theatr.

Bydd Sherman Cymru a Theatr Genedlaethol Cymru, mewn cydweithrediad â Galeri, Caernarfon yn cynhyrchu 'Sgint' gan Bethan Marlow, sydd yn cymryd golwg gonest a ffres ar yr hinsawdd economaidd bresennol a sut mae'n effeithio ar pobl o bob haen o gymdeithas.

Bydd y ddrama ar daith trwy Gymru yn Chwefror - Mawrth 2012.

Wedi ei chyfarwyddo gan Arwel Gruffydd, 'Sgint' fydd cynhyrchiad cyntaf newydd Cyfarwyddwr Artistig Theatr Genedlaethol Cymru ers iddo gymryd y llyw ym mis Mai eleni.

Bydd y ddrama, sydd wedi ei gosod yng Nghaernarfon, yn un o ddigwyddiadau allweddol tymor agoriadol Sherman Cymru yn ei adeilad newydd datblygedig  yng Nghaerdydd.

Dros y deunaw mis diwethaf, mae'r dramodydd Bethan Marlow wedi bod wrthi yn cyfweld amryw o wahanol drigolion Caernarfon - athrawes, dyn busnes, gwleidydd a mam sengl i enwi dim ond rhai.  Aeth Bethan ati i lunio'r ddrama allan o union eiriau'r trigolion a'r canlyniad yw drama wreiddiol gair am air am ymateb pobl i gael, a pheidio cael arian.

Meddai Arwel Gruffydd, Cyfarwyddwr Artistig Theatr Genedlaethol Cymru:  "Fe fydd 'Sgint' yn ddigwyddiad theatraidd nas gwelwyd o'r blaen yn y Gymraeg, lle mae lleisiau pobl go iawn yn cael eu clywed ar lwyfan mewn ffordd amrwd, onest ac o'r galon.  Er ein bod yn gweithio gydag actorion proffesiynol, fe fydd y ddrama yn cynnig adlewyrchiad ar fywyd go iawn a all fod yn anodd ei wylio ar brydiau - mae yma ambell i wirionedd annymunol iawn yma.

Aeth ymlaen:  "Ond ceir hefyd llawer iawn o hwyl, fel y byddech yn disgwyl o gymeriadau Caernarfon…… os gallaf ei galw yn hynny…..gan taw drama heb gymeriadau yw hon - yn defnyddio pobl go iawn  - nid gwaith dychymyg yr awdur.  Fe fydd yn sialens aruthrol i mi ac i'r actorion proffesiynol i adlewyrchu y gwirionedd yma, ac i bortreadu pobl Caernarfon, sydd wedi bod mor hael ei cymorth wrth greu 'Sgint'".

Meddai Cyfarwyddwr Sherman Cymru, Chris Ricketts:  "Comisiynwyd Bethan i weithio ar 'Sgint' ar ddechrau 2010, a rydym yn hynod o falch ein bod yn gallu dod a'r ddrama yma yn fyw trwy weithio gyda Theatr Genedlaethol Cymru.  Mae datblygu a chynhyrchu dramâu yn yr iaith Gymraeg yn ran canolog o waith Sherman Cymru.  Mae'n briodol iawn hefyd ein bod yn croesawu cynulleidfa 'Sgint' i mewn i'n hadeilad newydd a fydd yn adlewyrchu safon y cynyrchiadau a'r digwyddiadau sydd yn digwydd yma. "

Fe fydd 'Sgint' yn agor yn Sherman Cymru, Caerdydd rhwng 07-11 Chwefror 2012 cyn symud ymlaen i Galeri, Caernarfon 21-24 Chwefror; Theatr Mwldan, Aberteifi 28-29 Chwefror; Theatr Hafren, Y Dre Newydd 03 Mawrth; Theatr Y Lyric, Caerfyrddin 06-07 Mawrth a Chanolfan y Celfyddydau Aberystwyth 09-10 Mawrth 2012.

-diwedd-

Am fwy o wybodaeth am daith 'Sgint' cysylltwch â Elin Williams, Theatr Genedlaethol Cymru ar 01267 233882 neu e-bostiwch elin@theatr.com

Am fwy o wybodaeth am adeilad newydd Sherman Cymru a'r rhaglen agoriadol cysylltwch â Alice Baynham Sherman Cymru ar 029 2064 6967 neu e-bostiwch alice.baynham@shermancymru.co.uk

Mae Theatr Genedlaethol Cymru heddiw yn annog cynulleidfaoedd Cymru i archebu eu tocynnau o flaen llaw er mwyn sicrhau sedd ar gyfer gweld eu sioe nesaf, sef y sioe gerdd 'Deffro'r Gwanwyn'.

Gyda'r tocynnau i'r 3 perfformiad yng Nghaerdydd eisoes wedi eu gwerthu i gyd, mae'r Cwmni annog pobl i archebu eu tocynnau ar unwaith i berfformiadau eraill y sioe gerdd yn y de.

Mae'r sioe, sydd yn gyfieithiad o'r sioe gerdd boblogaidd 'Spring Awakening', yn agor yng Nghaerfyrddin yr wythnos nesaf gyda pherfformiadau o Nos Fercher 09 Mawrth 2011 - Nos Wener 11 Mawrth 2011 yn Y Llwyfan, Heol y Coleg.  Gellid archebu tocynnau o Theatrau Sir Gâr ar 0845 226 3510.

Yr unig gyfle arall i weld y sioe yn y de fydd ym Mhontardawe ar Nos Fawrth 22 Mawrth 2011 a Nos Fercher 23 Mawrth 2011. I archebu tocynnau cysylltwch â 01792 863722.

Meddai Elin Williams, Rheolwr Marchnata Theatr Genedlaethol Cymru:  "Rydym wrth ein boddau fod y sioe yn profi i fod yn ddewis poblogaidd yn y brifddinas, ac fe fyddem yn annog unrhywun arall sydd am weld y sioe i archebu eu tocynnau o flaen llaw er mwyn sicrhau lle.

"Er taw sioe am bobl ifanc yw 'Deffro'r Gwanwyn' mae'r themâu sy'n cael eu trafod yn addas ar gyfer pob oedran ac yn themâu oesol.  A gyda band yn chwarae yn fyw, mae hi'n argoeli i fod yn noson o adloniant gwych  - gobeithiwn yn fawr y bydd pobl yn dod i fwynhau noson o adloniant bythgofiadwy."

Gweler manylion y daith isod:

09-11 Mawrth 2011 CAERFYRDDIN Y Llwyfan, Heol y Coleg 0845 226 3510

15-16 Mawrth 2011 CAERDYDD - Wedi gwerthu

22-23 Mawrth 2011 PONTARDAWE Canolfan Hamdden Pontardawe 01792 863722

25-26 Mawrth 2011 ABERAERON Canolfan Hamdden Syr Geraint Evans 01239 621200

29 Mawrth - 01 Ebrill 2011 DOLGELLAU Canolfan Hamdden Glan Wnion 01341 421800

05-06 Ebrill 2011 LLANRWST Canolfan Hamdden Dyffryn Conwy 01492 642 357

08-09 Ebrill 2011 WRECSAM Canolfan Hamdden Plac Madoc, Acrefair 01978 293293

12-15 Ebrill 2011 YNYS MÔN Canolfan Hamdden Biwmares 01248 382828

Arwel Gruffydd yw Cyfarwyddwr Artistig newydd Theatr Genedlaethol Cymru, cyhoeddodd Yr Athro Ioan Williams, Cadeirydd Bwrdd Theatr Genedlaethol Cymru, ar Ddydd Gŵyl Dewi heddiw.

Fe fydd Arwel yn cychwyn yn llawn amser yn ei swydd newydd ar y 3ydd o Fai 2011.

Ar hyn o bryd, mae Arwel yn Gyfarwyddwr Cyswllt gyda Sherman Cymru lle mae'n gyfrifol am raglen Gymraeg y cwmni, yn cynnwys cynlluniau comisiynu a datblygu gwaith newydd a phrosiectau datblygu awduron newydd.

Yn wreiddiol o Danygrisiau ger Blaenau Ffestiniog, mae Arwel wedi gweithio yn eang fel actor ffilm, teledu a theatr a dros y blynyddoedd diwethaf mae wedi bod yn canolbwyntio ar ei waith fel cyfarwyddwr.

Mae ei waith cyfarwyddo yn cynnwys 'Llwyth', 'Ceisio'i Bywyd Hi', 'Yr Argae', 'Maes Terfyn' (Sherman Cymru), 'Gwe o Gelwydd' (Cwmni Inc), 'Mae Sera'n Wag' a 'Hedfan Drwy'r Machlud' (Sgript Cymru) i enwi dim ond rhai.

Meddai Arwel:   "Mae llywio'r Theatr Genedlaethol wrth iddi ailddiffinio'i hun ac ailystyried ei pherthynas ag aml gymunedau Cymru, yn her ac yn fraint aruthrol.

"Wrth i'r cwmni ddod allan o gyfnod o edrych i mewn arno'i hun, mae hi naill ai'n ddamwain ffortunus neu'n gynllun go giwt, fod fy mhenodiad yn digwydd pan mae cynhyrchiad nesaf y cwmni (sydd ar fin cychwyn ar daith drwy Gymru), yw Deffro'r Gwanwyn! Gobeithio fod hyn yn argoel dda.

"Heb os, mae'n gyfnod cynhyrfus i gychwyn gyda'r Theatr Genedlaethol, a dwi'n edrych ymlaen yn arw i fynd ati dros y misoedd nesaf i greu rhaglen o waith bywiog ac amrywiol ar gyfer 2012 ac i blannu hadau o bob math ar gyfer y blynyddoedd i ddod."

Meddai Ioan Williams, Cadeirydd Bwrdd Theatr Genedlaethol Cymru:  "Rydym wrth ein bodd bod Arwel yn mynd i arwain Theatr Genedlaethol Cymru dros y blynyddoedd nesaf.  Mae'n gyfnod cyffrous iawn ym myd y theatr Gymraeg ac mae cael rhywun sydd â phrofiad Arwel wrth y llyw yn mynd i'n helpu i lunio rhaglen artistig heriol ac edrychwn ymlaen yn eiddgar i weld ffrwyth ei lafur ar lwyfannau Cymru yn fuan."

Mae Theatr Genedlaethol Cymru wedi cychwyn ar y gwaith o ganfod Cyfarwyddwr Artistig newydd i'r Cwmni.

Fe fydd hysbysebion yn ymddangos yn y wasg yr wythnos hon yn cyhoeddi fod y Cwmni, sydd a'i swyddfeydd yng Nghaerfyrddin, yn edrych am Gyfarwyddwr Artistig newydd i greu gweledigaeth a chyfeiriad newydd i Theatr Genedlaethol Cymru ar gyfer y dyfodol.

Fe fydd y swydd yn un llawn amser ac yn benodiad am gyfnod o 5 mlynedd.

Fe ymadawodd Cefin Roberts y swydd o Gyfarwyddwr Artistig nôl ym mis Mawrth 2010 wedi cyfnod o 7 mlynedd wrth y llyw.   Ers hynny mae'r Theatr Genedlaethol wedi bod yn cynnal arolwg i adolygu gweithgaredd y Cwmni er mwyn cynllunio yn fanwl ar gyfer dyfodol llwyddiannus.

Meddai'r Athro Ioan Williams, Cadeirydd y Bwrdd Rheoli:  "Gyda dechrau blwyddyn newydd, rydym ninnau yn troi dalen newydd yn hanes Theatr Genedlaethol Cymru drwy edrych am Gyfarwyddwr Artistig newydd i'n harwain.

"Gobeithiwn yn fawr fod y swydd yn un apelgar ac y bydd yn denu cyfarwyddwyr ac ymarferwyr amryddawn i ymgeisio amdani."

Dyddiad cau ar gyfer ceisiadau fydd Dydd Llun 7fed Chwefror 2011.

Ceir pecyn gwybodaeth trwy ffonio 01267 233882 neu drwy e-bostio thgc@theatr.com.

Methu meddwl am ba anrheg Nadolig i brynu i'r person anodd hynny yn eich bywyd? Wedi bod yn crafu'ch pen am anrheg gwahanol i'r arfer?

Beth am brynu taleb iddynt i weld sioe nesaf Theatr Genedlaethol Cymru, 'Deffro'r Gwanwyn' a fydd yn teithio Cymru benbaladr yn ystod mis Mawrth a Ebrill 2011.

Cyfieithiad o'r sioe gerdd newydd 'Spring Awakening' yw 'Deffro'r Gwanwyn'.  Bu'r sioe yn llwyddiant mawr yn Llundain yn 2009 gan ennill cyfanswm o 4 gwobr Olivier - dau ohonynt i'r actorion o Gymru Aneurin Barnard a Iwan Rheon.

Bydd 'Deffro'r Gwanwyn', sydd a'r cast yn cynnwys Ffion Dafis, Dyfed Thomas, Aled Pedrick, Ellen Ceri Lloyd, Elain Lloyd, Elin Llwyd a Iddon Jones, yn cychwyn ar daith o amgylch Cymru ar 09 Mawrth 2011 gan ymweld â Chaerfyrddin, Caerdydd, Pontardawe, Aberaeron, Dolgellau, Llanrwst, Wrecsam a Biwmares.

Er mwyn prynu taleb fel anrheg Nadolig, cysylltwch gyda'r swyddfa docynnau leol (manylion isod) a gofynwch am daleb Nadolig Theatr Genedlaethol Cymru (ac eithrio Canolfan Mileniwm Cymru).  I gyfnewid y daleb am docyn, yr oll fydd yn rhaid i'r sawl sydd yn ei dderbyn fel anrheg ei wneud yw cysylltu â'r swyddfa docynnau erbyn 28 Chwefror 2011.

Meddai Elin Williams, Rheolwr Marchnata Theatr Genedlaethol Cymru:  "Mae gan bawb aelod o'r teulu neu ffrind sydd yn anodd prynu anrheg Nadolig iddynt, felly eleni am y tro cyntaf erioed, mae'r Theatr Genedlaethol wedi penderfynu cynnig taleb ar gyfer ein sioe nesaf ni 'Deffro'r Gwanwyn'.

"Mae hi'n argoeli i fod yn noson o adloniant gwych gyda cherddorfa yn chwarae yn fyw gan gynnig croesdoriad diddorol o ddrama a chyngerdd roc."

Cliciwch yma i gael manylion llawn y daith

-diwedd-

Am fwy o fanylion, cysylltwch â Elin Williams, Rheolwr Marchnata ar 01267 245617

Efallai fod Yr Arglwydd Sugar ar sioe deledu boblogaidd y BBC "The Apprentice' yn cael trafferth chwilio prentis da, ond mae Theatr Genedlaethol Cymru wedi canfod y prentis perffaith.

Bydd Fred Harvey-Love yn dechrau ar ei swydd gyda Theatr Genedlaethol Cymru ar 08 Dachwedd 2010 am gyfnod penodol o 12 mis -  y person cyntaf erioed i gael prentisiaeth gyda'r Cwmni.

Mae Theatr Genedlaethol Cymru yn cynnig prentisiaeth technegol a fydd, ar y cyd gyda Coleg Gorseinon, yn cynnig y cyfle i Fred i weithio tuag at gymhwyster Tystysgrif Lefel 2/3 Prentisiaeth Fodern 'Theatr Dechnegol:  Rigio, Goleuo a Sain'.

Daw Fred, sydd yn 18 oed, o Gaerdydd ac mae'n gyn ddisgybl Ysgol Gyfun Radyr yn y ddinas.  Mae ganddo ddiddordeb ysol mewn theatr a'r celfyddydau, ac eisoes, mae ganddo brofiad o weithio gefn llwyfan ar amryw o gynyrchiadau gan gynnwys cynyrchiadau Theatr Ieuenctid Cenedlaethol Cymru.

Meddai Fred:  "Edrychaf ymlaen yn eiddgar at weithio yn Theatr Genedlaethol Cymru.  Yn ystod fy mlwyddyn fel prentis, rwy'n awyddus i weithio mor galed a phosibl er mwyn cael gymaint o brofiad, hyfforddiant a gwybodaeth ar bob agwedd o waith technegol y theatr.  Gobeithiaf y bydd hyn yn gymorth i mi gael fy nerbyn ar gwrs Prifysgol perthnasol yn y dyfodol gan arwain y ffordd i mi gael gyrfa yn y maes."

Meddai Wyn Jones, Rheolwr Technegol a Gweithrediadau Theatr Genedlaethol Cymru:  "Mae'n bleser i allu cynnig y cyfle unigryw yma i berson ifanc, brwdfrydig fel Fred.  Bydd y brentisiaeth yn buddsoddi yn sgiliau technegwyr y dyfodol ac yn sicrhau fod siaradwyr Cymraeg yn cael y cyfle gorau i ennyn profiad ac i ddatblygu o fewn y maes."

-diwedd-

Am fwy o wybodaeth cysylltwch â Elin Williams, Rheolwr Marchnata at 01267 245617 neu e-bostiwch elin@theatr.com

Am y tro cyntaf erioed, fe fydd Theatr Genedlaethol Cymru yn llwyfannu sioe gerdd gyffrous a fydd yn cynnig profiad gwahanol i gynulleidfaoedd ar hyd a lled Cymru yng Ngwanwyn 2011.

Fe fydd y Cwmni cenedlaethol yn llwyfannu addasiad o ddrama ddadleuol Frank Wedekind, 'Spring Awakening' sef "Deffro'r Gwanwyn' sydd wedi ei gyfieithu i'r Gymraeg gan y dramodydd Dafydd James.

Mae'r ddrama yn portreadu grŵp o bobl ifanc sydd yn profi eu glasoed - rhai mewn anwybodaeth ac heb unrhyw fath o arweiniad. Mae eu hofn a'u chwilfrydedd yn eu harwain at brofiadau herfeiddiol sydd â chanlyniadau dirdynnol i rai ac i eraill yn newid cwrs bywyd am byth.

Ers i'r sioe gerdd 'Spring Awakening' agor am y tro cyntaf yn 2006 yn Broadway, America derbyniwyd canmoliaeth fawr iddi ac mae hi wedi ennill 7 Gwobr Tony yn Efrog Newydd a 4 gwobr Olivier yn Llundain - dau ohonynt gan y Cymry ifanc Aneurin Barnard ac Iwan Rheon.

Meddai Elin Williams. Rheolwr Marchnata Theatr Genedlaethol Cymru: "Mae'r prosiect yma yn cynnig her wahanol iawn i'r Cwmni ac edrychwn ymlaen at y sialens o lwyfannu sioe gerdd.  Mae hi'n argoeli i fod yn noson o adloniant gwych gyda cherddorfa yn chwarae yn fyw gan gynnig croesdoriad diddorol o ddrama a chyngerdd roc.

"Mae gwaith ymestyn mewn ysgolion a cholegau eisoes ar y gweill a gobeithiwn ddefnyddio technegau marchnata gwahanol i ddenu cynulleidfa newydd i'r theatr."

Y gyfarwyddwraig amryddawn Elen Bowman fydd wrth y llyw a dyma'r tro cyntaf iddi hi weithio o dan adain Theatr Genedlaethol Cymru.  Meddai:  "Er i'r ddrama wreiddiol gael ei ysgrifennu nôl yn 1891, mae'r themâu yn oesol ac mae'r modd yr addaswyd y ddrama i fod yn ddrama gerdd yn apelgar iawn i bobl ifanc.  Gobeithiaf yn fawr y bydd y gynulleidfa yn mwynhau'r profiad ac mae'n gyfle gwych i gast o actorion ifanc ymgymryd â sioe gerdd heriol a chreu noson fythgofiadwy a newydd iawn i lwyfannau Cymru."

Bydd rhagor o fanylion am y cast a'r daith yn cael ei datgelu yn fuan.